Thursday, November 24, 2011

PARE-PAREHO LANG ANG MGA LALAKI

               "Bilang lalaki, pakiramdam mo, may itinatago kaya sakin 'yon?" tanong ni Jennylyn.

               "Ayoko nang magkomento dyan dahil baka isipin mo gusto ko kayong magkahiwalay, Alam mo namang may gusto ako sa'yo" sagot ni Bingo. "Ikaw lang kasi, kung ako na lang sana..."

               Biglang tumingin sa kaliwa si Jennylyn at iniwas ang mukha kay Bingo. Halatang hindi nya nang gustong marinig ang sasabihin pa nito.

               "Sorry Bingo. Kaibigan lang talaga yung tingin ko sa'yo. Okay naman tayo ng ganto diba?"

               Hindi na sumagot si Bingo at tumingin na lamang sa cellphone nya. Halatang naghahanap ng dahilan para makaalis sa awkward na usapan nila ni Jennylyn.

               "Pasensya na Jen pero kailangan ko na palang umalis"

               "Totoo ba yan? Bakit naman galit ka sakin? Cool naman tayo diba?"

               "Yeah, we're cool. Uhm, paano, alis na ako"

                Pumunta si Bingo sa bahay ng tropa nyang si Jeremy. Doon ay nagyaya syang makipaginuman. Ngunit hindi pa man sila nakakarami ng inom ay nag-ring ang telepono ni Bingo. Tumatawag si Jennylyn.

                "Pre, bat ayaw mong sagutin?" tanong ni Jeremy. "Sino ba yang tumatawag?"

                "Si Jennylyn pre"

                "Jennylyn? As in yung type mo? Hindi ka pa rin ba sumusuko dyan?"

                "Nagsasawa na nga ako sa set-up namin. Pag sinusubukan kong iwasan sya, lapit naman ng lapit sakin. Ang hirap pre. Alam nya namang may gusto ako sa kanya tapos ganyan pa sya. Shit. Hindi ko na sasagutin yang tawag nya"

                Nagpaulit-ulit pa rin ang pag-ring ng cellphone at napilitan ng sagutin ni Bingo. Lumabas muna sya ng bahay ni Jeremy para makipagusap sa cellphone. Pagpasok nya ulit sa loob ay sinabi nya kay Jeremy na kailangan nya nang umalis.

                "Oh pre bakit?"

                "Tangina. Kailangan daw ng kausap. Nakipaghiwalay daw yung boyfriend nya"

                "Eh bakit ikaw ang gustong makausap? Pangatlong beses nya na atang ginagawa sa'yo yan ah. Si Joe D' Mango ka ba na lagi nyang kailangan makausap kapag iniiwan sya ng boyfriend nya?"

                "Nalalabuan na nga ako pre. Pero pre, anong oras ka ba matutulog mamaya? Pwede bang dito na lang ako makitulog sa bahay mo? Ayokong umuwi ng bahay ngayon. Inuman tayo mamaya"

                "Madaling-araw pa naman ako matutulog. Sige pre, deretso ka lang dito pagkatapos mong makipausap sa kanya"

                Nakipagkita sa kanya si Jennylyn sa basketball court malapit sa bahay nito. Walang mga tao doon dahil madilim na at wala namang nagpaschedule ng laro. Naupo sila sa bleacher at nagusap.

                "Jen, ayaw mo bang lumipat tayo ng pwesto? Lalamukin tayo dito"

                Hindi pinansin ni Jennylyn ang sinabi ni Bingo at sinabing "Pare-pareho lang ang mga lalaki..." na tila hindi lalaki ang kausap nya ngayon.


                Pasado ala-una ng madaling-araw ng makabalik si Bingo sa bahay ni Jeremy.

                "Pre, kamusta kanina?"

                "May nangyari samin ni Jennylyn"

                "Tangina. Seryoso? So ano na?"

                "Anong ano na?"

                "Ano ng plano mo? Syota mo na ba sya? Kayo na ba?"

                "Hindi pre, iiwasan ko na sya. Panakip-butas lang naman ang gagawin sakin non"

                "Parang hindi ko maintindihan?"

                "Tong mga babaeng 'to, akala ata nila hindi ka mapapagod na magmahal sa kanila. Hindi ba nila alam na masakit kapag alam nyang mahal mo sya pero ibang lalaki yung kinukwento nya sa'yo. Sawang-sawa na akong marinig kung paano syang niloloko ng ibang mga lalaki. Ang tagal ko nang nasa harapan nya, wala akong planong lokohin sya pero pinipili nya pa rin yung mga gagong 'yon. Tapos iiyak-iyak sya sakin. Hindi na ako magpapakatanga sa kanya. Pare-pareho lang naman ang mga babaeng yan"

                Habang naguusap ang dalawa ay biglang nagring ang phone ni Bingo.

                "Si Jennylyn pre?"

                "Oo" sagot ni Bingo sabay patay ng cellphone.

No comments:

Post a Comment

Books & Literature - Top Blogs Philippines